Plantun de Prouvènço

Pèr coumpara dos planto d'encò nostre

Catapodium rigidum & Panicum barbipulvinatum

Catapodium rigidum

Poaceae Graminaceae

Noms en français : Fétuque raide, Catapodium raide.

Descripcioun :
Lou sauno-gàrri, di proun coumun, trachis dins li tepiero seco, li roucaio e li sablo. Es uno pichoto planto touto redo. Li ramo soun verdo founso à la debuto e pièi vènon souvènt rouginasso emé lou tèms. Lis espigueto fan de 5 à 8 mm e caupon 3 à 13 flour. I'a pas trop pèr s'engana, pamens trachisson en ribo de mar dos àutri meno de Catapodium.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 3 à 35 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Catapodium
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 2 à 4 cm
Flourido : Printèms

Sòu : Ca
Autour basso e auto : 0 à 1200 m
Aparado : Noun
Abriéu à jun

Liò : Tepiero seco - Roucaio - Roucas - Sablo
Estànci : Termoumediterran à Coulinen
Couroulougi : Estenoumediterrano-Ouèst
Ref. sc. : Catapodium rigidum (L.) C.E.Hubb., 1953

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.